Eusko Jaurlaritzak gonbidatuta, TOKIKOMen ordezkaritza bat Korsikako Corti hirian izango da asteburuan, Linguimondi jardunaldietan. Korsikako Lurralde Kontseiluak 2011z geroztik antolatzen ditu jardunaldiok, Europako hizkuntz aniztasuna aztertzeko xedez, eta aurtengo edizioan Korsikerak bertako hedabideetan izan dezakeen garapena izango dute aztergai.
Kontestu horretan, Eusko Jaurlaritzak gonbidatuta, Alaitz Artolazabal eta Iban Arantzabalek euskarazko toki komunikabideen jardunaren nondik norakoa azalduko dute jardunaldiotan: Alaitz Artolazabalek euskarazko tokiko hedabideek osatzen duten enpresaren berri emango du, elkarlanerako dagoen enpresa kultura azpimarratuz: inbertsio partekatuak, formazio bateratua, edizio sistema, bideo-artxibo bateratua, web plataforma bateratua…
Iban Arantzabalek, berriz, hedabide baten kasu praktikoa agertuko du eta landuko dituen ideia nagusiak izango dira: ko-kudeaketa, gertutasuna eta beregaintasun soziopolitikoa.
Eusko Jaurlaritzak ere hitza hartuko du Linguimondin: Euskara Sustatzeko Zuzendariak, Esti Alkortak, hedabideekin azken bi urteetan landu eta lortutako itunaz jardungo du, eta ekimen publiko-pribatua batera joatearen garrantziaz.