Hainbat hilabetetako lanaren ondoren, TOKIKOMen sarea osatzen duten 18 aldizkarik edizio sistema bateratua ezartzen amaitu dute egunotan, beraien arteko koordinazioan eta profesionalizazioan urrats historikoa emanez.
Edizio sistema bateratua martxan jartzeko, TOKIKOMeko herri aldizkariek hainbat aurrelan ere egin behar izan dituzte, denek ere haien arteko eduki trukea erraztu eta argitaratzen dituzten produktuen kalitatean eragin zuzena izango dutenak.
TRESNEN ESTANDARIZAZIOA
Hasteko eta behin, edizio sistema bateratua martxan jarri ahal izateko, aldizkari guztiak diseinu eta maketazio programa eta bertsio berbera erabiltzen hasi dira. Horrela, aurrerantzean askoz errazagoa izango da aldizkarien artean edukiak trukatzea, jarraipen komuna eskatzen duten gaiak ateratzen direnean. Tresna beraren gainean lan egiteak, gainera, aukera berriak ekarriko dizkie tokiko aldizkariei: formazio saio komunak, mantenu informatikoa konpartitzeko aukera…
DISEINU KOMUNAK
Sistema aldaketa aprobetxatuz, aldizkarietako batzuek diseinua ere aldatu dute, formatu komun batera pasatuz-
Tresna estandarren gainean lan egitearen abantailak aprobetxatuz, aldizkarietako batzuek diseinua ere berritu eta bateratzeko aprobetxatu dute. Diseinu eta maketazioagatik hainbat sari jaso dituen GOIENAren laguntzaz, diseinu-liburutegi erraldoi bat osatu dute, nahi duten aldizkariek erabil dezaten. Horrela, aldizkari batzuk orain arte erabiltzen zuten maketazio ‘amateurra’ baztertu, eta haren ordez irizpide tekniko eta artistiko profesionalekin sortutako diseinuak erabiltzen hasi dira, azken produktuaren kalitatea nabarmen hobetuz. Bide batez, diseinu mailako estandarizazio horrek asko erraztuko du lana publizitatea bezalako alorretan, aldizkari horiek aurrerantzean iragarkietarako neurri berdinak erabiliko dituztelako.
SARE AZPIEGITURA ETA ARTXIBO KOMUNA
Azpiegitura aldetik ere, TOKIKOMek eta aldizkariek ahalegin handia egin dute garai eta lan molde berrietara egokitzeko, eta sare eta interkonexio azpiegitura konplexua ezarri dute, aldizkariak haien artean eta zerbitzari zentral batekin etengabe konektatuta egon daitezen. Hari esker, aldizkari bakoitzeko langileek erredakziotik zein kanpotik lan egiteko aukera izango dute, eta gainera, aldizkarietako bakoitzak klik batez partekatu ahal izango du bere materiala sareko gainontzekoekin. Eduki hori testu zein irudi gordinak izan daitezke edo, maketaziorako tresna berriei esker, guztiz bukatutako orrialdeak ere bai.
Partekatze hori errazteko, artxibo sistema komun bat ere jarri dute martxan aldizkariek. Aurrerantzean, aldizkari guztiek ekoizten duten edukia, izan testuak, argazkiak zein diseinu osoak, zerbitzari zentral batean gorde eta artxibatuko da, bilaketak erraz egin eta materiala erraz berrerabiltzeko moduan.
Sistema berria martxan jartzea hainbat hilabetetako lana izan da
Behin sistemaren inplantazioa bukatuta, aldizkariak pixkanaka-pixkanaka hasiko dira erabiltzen datozen asteotan, eta irakurleek laster sumatuko dituzte aldaketak. Jone Guenetxeak, Durangaldeko ANBOTO astekariaren zuzendaria eta TOKIKOMeko presidenteak, argi azaldu du: “Sistema honek ahalegin handia eskatu digu, eta oraindik ere gehiago eskatuko digu hurrengo asteotan, batez ere lan egiteko modua erabat aldatu eta ordenatzera behartuko gaituelako, baina seguru gaude onerako izango dela, lana era ordenatu eta profesionalagoan egiteko aukera emango digulako”.
TOKIKOMek apustu eta inbertsio handia egin du proiektu honekin, toki komunikabideen lehiakortasunean jauzi kualitatiboa ekarriko duelakoan. Taldeko zuzendaria den Alaitz Artolazabalek adierazi duenez: “Beste edozein industriatan bezala, toki komunikabideen esparruan ere funtsezkoa da berrikuntza, antolakuntzan zein teknologian, eta proiektu honek alderdi biak uztartzen ditu. Zentzu horretan, eskertzekoa da erakunde publikoek -eta bereziki Gipuzkoako Foru Aldundiak- kultur eta sormen industrian ere berrikuntza sustatzeko laguntzak martxan jarri izana”.
Aldizkarietako langileek formazio saio trinkoak jaso behar izan dituzte
