TOKIKOM Sariak 2024. Saridunak

Sakanako astekariak oso azal interesgarria landu zuen martxoko alean. Emakumeen Nazioarteko Egunari erreferentzia eginez, mezu garbia helarazten du. Irudi zehatzen eta sinboloen arteko konbinazio ederra egiten du. Nahiz eta irudi sinplea izan, oso adierazgarria da. Gainera, azalaren konposizioa oso ondo integratuta dago koloreen bidez.

Azpeitiko azken familia inprenta itxi eta gutxira egindako erreportajea da, eta zehazki inprenta horren historia jasotzeaz gain, sektore oso baten bilakaera nolakoa izan den ere oso egoki jasotzen du lanak. Tokikotasun handia du edukiak eta tokian tokiko industria, profesional eta historia jorratzen ditu gertutik, lekukotasunaren balioaz osatua dator artikulua. Estetika ere zaindua dago, iraganeko eta oraingo argazkiak ondo integraturik daude.

Jendarte eredu anitz eta inklusiboago baten aldeko ikus-entzunezko eduki sorta honek, migrazioaren gora beherak larru azalean bizi dituztenei eman diete hitza, besteak beste. Gaiaren trataera egokia da eta tokian tokitik lantzen du migrazioarena bezalako fenomeno globala. Hainbat tokiko pertsonen ikuspuntua jasotzen du eta eduki guztiak lerrokaturik daude euren artean. Alde estetikoa ere oso landua dago eta kazetaritza aldetik oso lan borobila da.

Laboral Kutxaren eskutik, TOKIKOM Sarien edizio honetan NAFARROA SARIA ere eman dugu lehenengoz. Nafarroako Ultzamaldeko komunikabide txiki baten historian, oso ongi jasotzen du garai hartan Nafarroako toki askotan pil-pilean zegoen euskarafobia. Euskara hutsezko irratia bultzatu zuten herritarren, irratiko lehenengo esatarien, ondoren pasa zirenen, orduko euskara teknikarien, entzuleen eta kolaboratzaileen iritziak oso ongi daude jasota dokumentalean. Nafarroako pertsonen ilusioak, auzolanak eta komunitateak proiektua aurrera eramateko izan zuen indarra, baita euskarazko irratiak landa eremuko eskualdeari egindako ekarpena ikus daiteke edukian zehar. Edukiaren estetika ere oso zaindua dago, iraganeko irudiak zuzen tartekatzen dira oraingoekin.